無間道生活

我想，我真的累了。
近來，對自己所做的工作是什麼越來越模糊。
更害怕一些從不知道我做什麼的人問我做什麼工作，
回答的時候表面上總是結結巴巴，真正的原因是內裡患上精神分裂。
我可以答：
我做導演、
我做剪接、
我寫稿的、
我係攝影師、
我錄ＶＯ嘅、
我乜嘢都唔係，我係打雜。
我甚至乎可以唱出來：「我是什麼？十萬個當中只得一個.....」
近來還多了一個 title, 「我係記者」.....不過，我唔係新聞系出身的，而我亦不喜歡做新聞。
係咪要做到咁先至叫做好？係咪要咁爛做先至叫做襟撈？
我不知道，我只知道如果這樣做出來的一定不會精，而自己亦變成了「周身刀，冇張利」。
自己拿著一大堆重得已接近不能負荷的拍攝器材到達拍攝場地，
set up. 打燈，拿著攝影機，喊：roll 機，action......直到 cut。
工作時頂硬上，放假時周身骨痛。
「你睇吓你，成個阿伯咁，又話膊頭痛又話膝頭痛，唉.....」
係咪要捱到年老時一拐一拐，周身病痛才能證明你年輕時真的努力過？
當然我同你講你梗係唔會明。

明天早上，我是剪接師，下午，我是導演及攝影師，（想到那一舊二舊的器材就驚），
到了週中，我又是記者及攝影師了。

正邁向第三個年頭了。
當然我絕對不會容許當自己６０歲（假如有的話）時說：「就是這樣，３年又３年....」
啞子吃黃蓮，你不理解是當然的。
你會覺得：「作為一個汽車維修員，從褲管內掉出一把 "士巴拿" 是很合理的」，縱然你身處在球場上。

「我是什麼？十萬個當中只得一個，葡萄園裡，響起水仙子的讚歌.....」